ജനാധിപത്യവും മതേതരത്വവും ഹൃദയത്തിലില്ലാത്തസാഹിത്യകാരന്മാർ അപകടകാരികൾ സക്കറിയ

കൊച്ചി:എഴുത്തുകാരൻ എന്ന നിലയിലുള്ള തന്റെ സ്വാതന്ത്ര്യം അവസാനിച്ചതായി സാഹിത്യകാരൻ സക്കറിയ. സ്വാതന്ത്ര്യ സമര സേനാനീയും പത്രാധിപരും ആയിരുന്ന എബ്രഹാം മാടമാക്കലിന്റെ സ്മരണയ്ക്കായി നവോത്ഥാന സാംസ്‌കാരിക കേന്ദ്രം ഏർപ്പെടുത്തിയ അവാർഡ് സ്വീകരിച്ചു സംസാരിക്കുകയായിരുന്നു സക്കറിയ. മതേതര വിശ്വാസികളെന്നു നാം കരുതിയിരുന്നവർ പോലും വർഗീയതയുടെ പിടിയിലായി പോകുന്ന കാഴ്ചയാണിന്ന്. ജനാധിപത്യവും മതേതരത്വവും ഹൃദയത്തിലില്ലാത്ത സാഹിത്യകാരന്മാർ ഏറ്റവും അപകടകാരികളാണ്. തങ്ങളുടെ രചനകൾ മനുഷ്യർക്കെതിരെ ഉപയോഗിച്ചില്ലെന്നതാണ് എബ്രഹാം മാടമാക്കലിന്റെ തലമുറയുടെ സവിശേഷത എന്നും സക്കറിയ ചൂണ്ടിക്കാട്ടി.

ഒ.എൻ.വി., എം.എൻ.വിജയൻ, വയലാർ തുടങ്ങിയ പ്രതിഭകളെ പ്രോത്സാഹിപ്പിക്കുന്നതിൽ ശ്രദ്ധിച്ച മാധ്യമ പ്രവർത്തകനായിരുന്നു എബ്രഹാം മാടമാക്കലെന്ന് ചടങ്ങ് ഉദ്ഘാടനം ചെയ്ത മലയാള മനോരമ എഡിറ്റോറിയൽ ഡയറക്ടറം എഴുത്തുകാരനും ആയ ജോസ് പനച്ചിപ്പുറം പറഞ്ഞു. മാടമാക്കലിനെ മറന്നു പോയ മലയാളം മറ്റു മൂന്നു പേരെയും ആഘോഷിച്ചതായും അദ്ദേഹം പറഞ്ഞു.

നവോത്ഥാന സംസ്കാരിക കേന്ദ്രത്തിന്റെ സ്‌ഥാപക പ്രസിഡന്റും ഇടതുപക്ഷ നേതാവും ആയ എം.എം. ലോറൻസിനെ കുറിച്ചുള്ള സ്മരണിക അദ്ദേഹത്തെ അന്ത്യകാലം പരിചരിച്ച നാലു തൊഴിലാളി യൂണിയൻ പ്രവർത്തകർക്കു നൽകികൊണ്ടു സി.പി.ഐ. (എം) എറണാകുളം ജില്ല സെക്രട്ടറി എസ്. സതീഷ് പ്രകാശനം ചെയ്തു. കേന്ദ്രത്തിലെ കേരള പ്രതിനിധി പ്രൊഫ. കെ.വി.തോമസ്, നവോത്ഥാന സാംസ്കാരിക കേന്ദ്രം അധ്യക്ഷൻ കെ.എം. ശരത്ചന്ദ്രൻ,സെക്രട്ടറി ഷാജി ജോർജ് പ്രണത, ട്രഷറർ അഷറഫ് ചുള്ളിക്കൽ എന്നിവർ പ്രസംഗിച്ചു.